Framkvæmdir hafnar við Búrfellslund

Við þetta tilefni heimsótti Guðlaugur Þór Þórðarson, umhverfis-, orku- og loftslagsráðherra verkstað við Vaðöldu í hressilegu, íslensku haustveðri. Á svæðinu er vegavinna og innviðauppbygging hafin, veglagning og undirbúningur fyrir uppsetningu vinnubúða.

Ásbjörg Kristinsdóttir, framkvæmdastjóri framkvæmda

„Það er mikið fagnaðarefni að framkvæmdir séu hafnar við Búrfellslund,“ sagði Guðlaugur Þór. „Við vitum öll að það er mikil þörf fyrir aukna endurnýjanlega orku til að mæta vexti samfélagsins og bæta raforkuöryggi. Þetta er heillaskref í sögu þjóðarinnar og gott að sjá hversu vel hefur verið vandað til verka hjá Landsvirkjun í þessu verkefni.“

Guðlaugur Þór Þórðarson, umhverfis-, orku- og loftslagsráðherra og Hörður Arnarson, forstjóri á verkstað

Sveitarstjóri Rangárþings ytra, Jón G. Valgeirsson, tók undir þetta: „Það er gaman að verða vitni að þessum merku tímamótum í Íslandssögunni. Hér hjá okkur mun fyrsti hluti þessarar þriðju stoðar orkukerfisins rísa.“

Búið er að velja vindmylluframleiðanda eftir útboð á fyrri hluta árs. Verið er að ganga frá samningum og verður tilkynnt hvaða framleiðandi átti hagstæðasta tilboðið á næstu dögum. Vindmyllurnar verða reistar á árunum 2026 og 2027 og verður fyrri hluti vindorkuversins gangsettur haustið 2026.

Hörður Arnarson, forstjóri Landsvirkjunar, fagnar því að þetta mikla nýframkvæmdatímabil hjá fyrirtækinu sé hafið:

„Það er virkilega ánægjulegt að sjá hjólin vera farin að snúast hér á Þjórsár-Tungnaársvæðinu þar sem umfangsmiklar framkvæmdir verða næstu árin. Það er ekki bara bygging vindorkuversins hér við Vaðöldu heldur er líka um að ræða byggingu Hvammsvirkjunar og stækkun Sigölduvirkjunar. Undirbúningur þessara verkefna hefur staðið áratugum saman og tímabært að hefjast handa.“

Fjallað verður nánar um framkvæmdirnar á haustfundi Landsvirkjunar sem verður haldinn á Hótel Selfossi 30. október.