Beint í efniLandsvirkjun

Nýsköpun

Mikil tækifæri liggja í nýsköpun tengdri endurnýjanlegri orku. Sú þekking sem skapast hefur á undanförnum árum, þeir innviðir sem byggðir hafa verið upp og það umhverfi sem orðið er til í kringum nýsköpun eru kjörlendi fyrir frjóar hugmyndir og sköpunarkraft.

Nýsköpun í orkuiðnaði

Nýsköpun í orkuiðnaði er sívaxandi hluti af starfsemi okkar. Fyrirtækið er leiðandi í sjálfbærri nýtingu endurnýjanlegra orkugjafa og stuðlar að aukinni þekkingu, nýsköpun og tækniþróun. Með meiri nýsköpun og aukinni verðmætasköpun nýtum við betur þær auðlindir sem okkur er trúað fyrir og leggjum grunn að sterkara og betra samfélagi.

Við eigum í margvíslegu samstarfi við fjölmarga aðila: frumkvöðla, háskóla og aðrar menntastofnanir, fyrirtæki og einstaka vísindamenn, innan jafnt sem utan landsteinanna. Auk þess stundum við fjölbreyttar rannsóknir á lífríki landsins, veðurfari, vatnafari, jöklum og jarðfræði.

Tækifæri fyrir atvinnuuppbyggingu

Tækifærin eru mýmörg fyrir atvinnuuppbyggingu í grænum orkusæknum iðnaði. Græn og endurnýjanleg orka gefur okkur til að mynda kost á að framleiða græn og heilnæm matvæli. Sama græna orkan gefur okkur færi á að hætta tugmilljarða króna innkaupum á bensíni og olíu á hverju ári og framleiða vetni og annað umhverfisvænt eldsneyti. Þá kallar rafbílavæðingin á stóraukna framleiðslu á rafhlöðum.

Gagnaversiðnaður er í stöðugri sókn, enda verða gögn sífellt mikilvægari í atvinnulífinu og daglegu lífi fólks. Hér á landi getum við knúið þessa mikilvægu starfsemi með endurnýjanlegri orku, hér eru innviðir traustir og hér hentar loftslagið gagnaverum vel.

Allt eru þetta tækifæri sem ætti að sækja til að skjóta styrkari stoðum undir hagkerfið um leið og við leggjum enn meira af mörkum í baráttunni gegn loftslagsvánni þar sem við njótum sérstöðu á heimsvísu með framleiðslu og nýtingu grænnar orku. Um leið skapast ný, eftirsótt störf, aukin verðmæti og orkusjálfstæði landsins verður tryggt.

Samstarfsverkefni í orkutengdri nýsköpun

Kynntu þér samstarfsverkefnin:

Orkídea, Eimur, Blámi og Eygló

Orkutengd tækifæri á Suðurlandi

Orkídea er samstarfsverkefni um nýsköpun á Suðurlandi á vegum Landsvirkjunar, Samtaka sunnlenskra sveitarfélaga, Landbúnaðarháskóla Íslands og sjávarútvegs- og landbúnaðarráðherra.

Helsta markmið samstarfsins er að auka verðmætasköpun og greiða veg orkutengdra tækifæra, einkum á sviði hátæknimatvælaframleiðslu og líftækni. Ætlunin er að efla nýsköpun og rannsóknir á nýtingu grænnar orku og koma á öflugu samstarfi við bæði fræðasamfélagið og atvinnulífið.

Markmiðið er að fjölga möguleikum svæðisins til að takast á við áskoranir samtímans, auka samkeppnishæfni íslenskra afurða á alþjóðlegum markaði og gera Suðurland leiðandi í samspili orku, umhverfis og samfélags.

Heiti verkefnisins, Orkídea, er sprottið af orðunum orka og ídea. Þannig vísar nafnið bæði til grænnar orku og þeirra nýstárlegu hugmynda sem spretta í frjóum jarðvegi.

Verðmætasköpun á Vestfjörðum

Blámi er samstarfsverkefni Landsvirkjunar, Vestfjarðastofu og Orkubús Vestfjarða um orkuskipti og orkutengda nýsköpun á Vestfjörðum

Meginmarkmið Bláma er að efla nýsköpun og þróun orkuskiptaverkefna. Með orkuskiptum er átt við að auka hlut vistvæns eldsneytis, vetnis og rafeldsneytis í samgöngum og iðnaði. Markmiðið er að ýta undir orku- og loftslagstengda nýsköpun, efla frumkvöðla og styrkja nýsköpunarumhverfið á Vestfjörðum.

Ætlunin með Bláma er að leiða saman aðila sem geta unnið saman við það að afla alþjóðlegs fjármagns til tilrauna, rannsókna og þróunar á orku- og loftslagsvænum lausnum. Með nýjum tækifærum og auknu samstarfi á milli fyrirtækja og opinberra aðila er hægt að ýta undir að verkefni og tækifæri sem skapast á svæðinu þróist í átt að hringrásarhagkerfi, þar sem verðmætasköpun úr vannýttu hráefni er aukin, bæði úr því sem er til staðar og því sem verður til vegna nýrra verkefna eða framleiðslu.

Nýsköpun á Norðurlandi

Nýsköpunarverkefnið EIMUR er samstarfsverkefni sem hefur bætta nýtingu orkuauðlinda og aukna nýsköpun í orkumálum á Norðurlandi að leiðarljósi.

Markmið samstarfsins er meðal annars að stuðla að uppbyggingu atvinnulífs og að aukinni verðmætasköpun með sérstaka áherslu á sjálfbærni, grænar lausnir, nýsköpun og hátækni á svæðinu. Einnig er lagt upp úr að miðla þekkingu á sviði rannsókna og nýsköpunar á Norðurlandi í því skyni að efla samkeppni á stærri markaði þar sem styrkleikar Íslands spila lykilhlutverki.

Síðastliðin ár hefur EIMUR meðal annars staðið fyrir kortlagningu auðlinda, haldið út alþjóðlegum sumarskóla í hönnun og sjálfbærni í Kröflu, staðið fyrir hugmyndasamkeppni og ýmsum kynningarmálum. Einnig hefur EIMUR lagt ríka áherslu á samstarf við háskóla og rannsóknastofnanir.

Orkuríkt samstarf á Austurlandi

Eygló er samstarfsverkefni Landsvirkjunar, umhverfis-, orku- og loftslagsráðuneytisins, Austurbrúar og sveitarfélaga á Austurlandi um eflingu orkuskipta, orkunýtni og hringrásarhagkerfis á Austurlandi. Heiti verkefnisins vísar til öflugasta orkugjafans, sólarinnar, og til bjartrar og kraftmikillar framtíðar.

Markmið samstarfsins er að minnka kolefnisspor í samstarfi við einstaklinga, fyrirtæki og stofnanir á Austurlandi. Eygló mun kortleggja orku- og efnisstrauma í landshlutanum og stuðla að samdrætti í losun gróðurhúsalofttegunda. Til að ná þessu markmiði verður unnið að því að setja á fót verkefni sem stuðla að framförum í orkuskiptum, orkunýtni og hringrás:

  1. Stuðla að minni notkun jarðefnaeldsneytis á Austurlandi í sjávarútvegi, samgöngum og iðnaði.
  2. Draga úr orkunotkun á Austurlandi með því að stuðla að uppbyggingu fjarvarmaveitna.
  3. Stuðla að endurnýtingu úrgangsstrauma og minnka þannig magn til urðunar frá Austurlandi.