Rúmar 72 milljónir til 46 verkefna

Að vanda voru verkefnin afar fjölbreytt en öll í samræmi við tilgang Orkurannsóknasjóðs, sem er að efla rannsóknir á sviði umhverfis- og orkumála, hvetja námsfólk til að velja sér viðfangsefni á þeim sviðum, gera fjárframlög orkufyrirtækis þjóðarinnar til rannsókna bæði skilvirkari og sýnilegri og tryggja að þær rannsóknir sem styrktar eru aðstoði við að ná fram framtíðarsýn okkar, sem er sjálfbær heimur knúinn endurnýjanlegri orku.

Að meðtöldum styrkveitingum þessa árs, sem voru samtals 72,159 milljónir kr., hefur sjóðurinn veitt 459 styrki til rannsóknarverkefna. Viðfangsefnin í námi og rannsóknarverkefnum skiptast nokkuð að jöfnu milli orku- og virkjunarmála og náttúru- og umhverfismála. Í heild hafa styrkir sjóðsins á þessum árum numið einum milljarði og 60 milljónum króna.

Jóna Bjarnadóttir

Jóna Bjarnadóttir, framkvæmdastjóri Samfélags og umhverfis hjá Landsvirkjun, ávarpaði styrkþega. Hún sagði m.a. að á þeim 18 árum sem liðin eru frá því styrkveitingar hófust hafi áhersla á rannsóknir tengdar endurnýjanlegri orku hér á landi aukist og ánægjuefni að sjá hve mörg veldu nú að fara inn á þessa braut. „Við hjá Landsvirkjun erum afar stolt af þessu framlagi sjóðsins til orku- og umhverfismála og þeim mörgu frábæru verkefnum sem hafa hlotið brautargengi í krafti þessara styrkveitinga í gegnum árin,“ sagði Jóna.

Ragna Karlsdóttir

Ragna Karlsdóttir, stjórnarformaður Orkurannsóknasjóðs, sagði að við mat á umsóknum væri skoðað hversu vel verkefnið félli að tilgangi og markmiðum sjóðsins og hversu líklegt það væri til að afla nýrrar þekkingar. Litið til starfsferils umsækjanda, rannsóknarferils, samstarfsaðila og aðstöðu umsækjanda til að sinna verkefninu. Jafnframt er litið til þess að styrkféð dreifist á sem flest viðfangsefni, eftir því sem umsóknir gefa tilefni til. Einnig var litið til þess hvort meistara- og/eða doktorsnemar svo og nýdoktorar væru aðilar að verkefninu.

Ólafur Rögnvaldsson kynnir verkefni um sannreyningu veðurspáa

Venju samkvæmt kynntu þrír styrkþegar verkefni sín við athöfnina. Það voru þau Ólafur Rögnvaldsson, sem sagði frá sannreyningu veðurspáa í rauntíma, Sóllilja Bjarnadóttir, sem fjallaði um viðhorf almennings til loftslagsaðgerða og réttlátra umskipta og Samuel Scott, en erindi hans bar heitið Advancing Geothermal Reservoir Models for Superhot Systems.

Sóllilja Bjarnadóttir segir frá viðhorfum almennings til loftslagsaðgerða og réttlátra umskipta

Í stjórn Orkurannsóknasjóðs eru nú, auk Rögnu Karlsdóttur formanns, Ólafur Arnar Jónsson, forstöðumaður Nærsamfélags og náttúru hjá Landsvirkjun, Hildur Harðardóttir verkefnastjóri á deild Loftslags og áhrifastýringar hjá Landsvirkjun, Hrund Ólöf Andradóttir, prófessor í umhverfisverkfræði við Háskóla Íslands, Halldór Guðfinnur Svavarsson, prófessor við tækni- og verkfræðideild Háskólans í Reykjavík og Brynhildur Bjarnadóttir, dósent við hug- og félagsvísindasvið Háskólans á Akureyri.

Samuel Scott kynnir verkefni sitt.