Krafla, umbrot og uppbygging
Heimildarmyndin Krafla, umbrot og uppbygging var framleidd af OB Films í Mývatnssveit fyrir Landsvirkjun árið 2024 í tilefni þess að 40 ár voru liðin frá lokum Kröfluelda.
Verkefnið var metnaðarfullt en afar mikilvægt til þess að varðveita og taka saman þær heimildir sem til eru frá þessum tíma.
Mikið af myndefni birtist hér í fyrsta sinn, viðtöl við fólkið á svæðinu sem upplifði þetta langa gostímabil og þurfti ítrekað að rýma heimili sín þegar mest lét. Íbúar á svæðinu fengu margir vinnu við að fylgjast með gosóróa og gáfu skýrslur til fjölmiðla á hverjum morgni.
„Þarna var greinilega sálin að vinna úr þessu einhvern veginn, ekki bara hjá mér heldur hjá mörgum öðrum þannig að ég held að áfallið hafi verið miklu meira en menn létu upp og viðurkenndu kannski fyrir sjálfum sér“
Þetta rifjar Ólafur Þröstur Stefánsson, mývetningur upp en eldgosahrinan við Grindavík hefur hrært upp ótal minningar og tilfinningar hjá þeim sem muna eftir Kröflueldum.
Í myndinni er rætt við Ólaf, Jón Árna Sigfússon, Birki Fanndal Haraldsson, Júlíus Sólnes og Ásdísi Illaugadóttur, mývetninga ásamt Páli Einarssyni jarðeðlisfræðing.
Við þökkum þeim, og öllum sem lögðu til upplýsingar, sögur, ljósmyndir og myndefni, kærlega fyrir aðstoðina.
