Neyðarstjórn Landsvirkjunar (NLV) stýrir viðbrögðum fyrirtækisins við vá. Forgangsverkefni hennar er að koma í veg fyrir slys á fólki, tjón á mannvirkjum og umhverfi og að raforkuvinnsla skerðist.
Meginhlutverk NLV er tvíþætt – annars vegar skipuleggur hún neyðarstjórnun fyrirtækisins, en í henni felst m.a. að hafa umsjón með viðbragðsáætlunum, æfingum, þjálfun, endurskoðun og samræmingu á verklagi í vá. Hins vegar stýrir hún aðgerðum og viðbrögðum í vá, ásamt vettvangsstjórum.
Forstjóri ber ábyrgð á neyðarstjórninni og sér um að skipa hana. Framkvæmdastjóri Vatnsafls er formaður NLV og ber hann ábyrgð á starfi stjórnarinnar í umboði forstjóra.
Neyðarsamstarf raforkukerfisins (NSR), er samvinnuvettvangur vinnslufyrirtækja, flutningsfyrirtækis, dreifiveitna, stórnotenda og opinberra aðila á Íslandi vegna vár sem steðjar að vinnslu, flutningi eða dreifingu raforku og rekstri stórnotenda.
NSR er ekki viðbragðsaðili og tekur því ekki yfir stjórn aðgerða í vá. Hún er í höndum neyðarstjórna aðila samstarfsins. Landsnet er í forsvari fyrir NSR.
Efla samvinnu aðila samstarfsins vegna vár og vinna að þjóðarhag með því að auka öryggi raforkuvinnslu, raforkuflutnings, raforkudreifingar og reksturs stórnotenda.
Treysta tengsl við Samhæfingarstöð almannavarna og aðra tengda aðila vegna forvarna og viðbragða í vá.
Stuðla að greiðri upplýsingamiðlun og samræmdum neyðarfjarskiptum í vá.
Stuðla að samræmingu hugtakanotkunar, verklags (viðbragðsáætlana) og skilgreininga í lögum og reglugerðum á ábyrgð og skyldum þátttakenda vegna viðbragða í vá.