Í fararbroddi þriðja árið í röð
Landsvirkjun situr þriðja árið í röð á lista Financial Times yfir þau evrópsku fyrirtæki sem hafa lækkað losun á framleiðslueiningu hvað mest á árunum 2017-2022. Orkufyrirtæki þjóðarinnar var fyrsta íslenska fyrirtækið sem komst á listann en alls fá 500 fyrirtæki viðurkenningu sem Europe Climate Leaders
Samdráttur okkar í losun á framleiðslueiningu nam 8,7% tímabilið 2017-2022. Aðeins eitt annað íslenskt fyrirtæki er á listanum í ár en það er Arionbanki sem nú er þar annað árið í röð. Við óskum bankanum til hamingju með þann árangur.
Listinn tekur til beinnar losunar og losunar vegna orkunotkunar. Þá var einnig horft m.a. til losunar á hagnað, samdráttar í heildarlosun og einkunnar viðkomandi fyrirtækis hjá alþjóðlegu samtökunum CDP, en einkunn Landsvirkjunar þar er A og telst fyrirtækið leiðandi í loftslagsmálum.
Þá er rétt að taka fram að fyrirtæki sem valda umtalsverðum umhverfisskaða komast ekki á þennan lista Financial Times jafnvel þótt þau uppfylli kröfur um samdrátt í losun.
