Landsvirkjun tekur fyrstu skref inn á skipulegan raforkumarkað

Landsvirkjun tekur þátt í söluferli fyrir langtímavörur, þ.e. grunnorku og mánaðarblokkir, sem Vonarskarð hefur auglýst í maí og júní. Fyrra söluferlið fyrir grunnorku var í dag og seldi Landsvirkjun rúmlega 90 GWst af raforku fyrir um 700 milljónir kr. Söluferli fyrir mánaðarblokkir verður á morgun.

Þetta eru fyrstu skref orkufyrirtækis þjóðarinnar inn á skipulegan raforkumarkað. Þá hefur fyrirtækið einnig verið í sambandi við Elmu, dótturfélag Landsnets, um mögulega þátttöku á markaði fyrir skammtímavörur sem áformað er að taki til starfa í upphafi næsta árs. Landsvirkjun hefur til þessa starfrækt eigin viðskiptavef þar sem raforka er seld til sölufyrirtækja.

Umhverfis-, orku- og loftslagsráðuneytið hefur veitt tveimur fyrirtækjum, Elmu orkuviðskiptum ehf. og Vonarskarði ehf., leyfi til reksturs raforkumarkaðar, í samræmi við orkustefnu stjórnvalda. Slíkir markaðir hafa verið starfræktir í nágrannalöndum okkar í áratugi og gefa mikilvægar upplýsingar um raforkuverð, eftirspurn og framboð.

Vonarskarð opnaði í vetur raforkumarkað með þátttöku allra sölufyrirtækja þar sem þeim býðst að eiga viðskipti sín á milli. Sölufyrirtækin eru níu og selja rafmagn áfram til heimila og smærri fyrirtækja; Atlantsorka, Fallorka, HS Orka, N1, Orka heimilanna, Orka náttúrunnar, Orkubú Vestfjarða, Orkusalan og Straumlind.

Af þessum níu sölufyrirtækjum eru fimm sem einnig vinna raforku sjálf. Landsvirkjun starfar eingöngu sem orkuvinnslufyrirtæki og selur orkuna í heildsölu eða beint til stórnotenda en ekki áfram í smásölu.

Skipulegur raforkumarkaður skapar ramma utan um viðskipti með heildsölurafmagn og styður við aukið raforkuöryggi en tryggir það ekki. Liður í því er að draga fram mikilvægar upplýsingar um stöðuna á raforkumarkaði og birta á opinberum vettvangi.

Landsvirkjun greiðir fasta þóknun, 1,5 millj., fyrir söluferlið í maí. Þátttaka í skipulegum raforkumarkaði verður endurmetin þegar reynsla hefur fengist, en Landsvirkjun hefur þegar ákveðið að taka þátt í söluferlinu í júní.

„Stofnun skipulegs raforkumarkaðar hér á landi er jákvætt skref og það verður spennandi að fylgjast með þróun hans. Vonir okkar standa til þess að samkeppni á raforkumarkaði aukist enn frekar í kjölfarið og að gegnsæi í verðmyndun verði betra. Raforkumarkaðir Elmu og Vonarskarðs eru einnig mikilvægur liður í að auðvelda innkomu nýrra aðila sem vinna raforku.“

-
[Uppfært 14. maí] Landsvirkjun seldi í dag rúmlega 150 GWst af raforku í söluferli fyrir mánaðarblokkir á raforkumarkaði Vonarskarðs ehf. Söluverðið var um 1,2 milljarðar króna.