Núgildandi öryggis- og heilsustefna var samþykkt af stjórn Landsvirkjunar í janúar 2024.
Tilgangur öryggis- og heilsustefnu Landsvirkjunar er að skapa vinnustað þar sem öryggi og heilsa starfsfólks er í forgrunni. Markmið okkar er öruggt og heilsusamlegt vinnuumhverfi sem stuðlar að vellíðan á vinnustað og heilbrigðri vinnustaðamenningu.
Landsvirkjun hlítir þeim kröfum sem gerðar eru til fyrirtækisins, skuldbindingum sem það hefur undirgengist og hefur stöðugar umbætur að leiðarljósi.
Landsvirkjun er í fararbroddi í öryggis- og heilsumálum.
Við sköpum öruggt og heilsusamlegt vinnuumhverfi með áherslu á að fyrirbyggja slys og atvinnutengda sjúkdóma sem valda eða geta valdið varanlegum skaða.
Við leggjum áherslu á vellíðan starfsfólks og heilbrigða vinnustaðamenningu.
Margt í starfsemi Landsvirkjunar er áhættusamt. Við áhættumetum öll störf, höfum stjórn á líkamlegri og sálfélagslegri áhættu, höfum nauðsynleg varnarlög til staðar og tökum ekki óásættanlega áhættu.
Við stofnum ekki lífi og heilsu starfsfólks í hættu fyrir fjármuni, tíma, framleiðslu eða aðra þætti í starfsemi fyrirtækisins. Við gerum óhikað athugasemdir við óöruggt verklag eða aðstæður og stöðvum vinnu ef við teljum að öryggi sé ekki tryggt.
Við eigum opin og heiðarleg samskipti við innri og ytri hagsmunaaðila um öryggi og heilsu. Við leggjum áherslu á skýra ábyrgð stjórnenda og að starfsfólk viti að öryggi þeirra hefur alltaf forgang.
Við leggjum áherslu á að öll taki virkan þátt í að skapa öruggt og heilsusamlegt vinnuumhverfi, við lærum af þeim atvikum sem verða og öxlum ábyrgð á eigin öryggi og annarra.