„Rekstur Landsvirkjunar á fyrsta ársfjórðungi gekk vel miðað við aðstæður. Eftir tvö einstök rekstrarár í sögu fyrirtækisins er afkoman áfram góð.
Hagnaður af grunnrekstri nam 77,4 milljónum bandaríkjadala á fjórðungnum og minnkaði um tæp 29% frá sama tímabili í fyrra. Handbært fé frá rekstri nam 101 milljón dala og dróst saman um tæp 30%. Bæði hagnaður af grunnrekstri og handbært fé frá rekstri stóðust þó samanburð við fyrsta ársfjórðung 2022, sem þá var metár.
![Hörður Arnarson, forstjóri Landsvirkjunar](https://images.prismic.io/landsvirkjun-vefur/ZeiLWnUurf2G3Ko4_landsvirkjun_arsfundur_2024-23-2100x1401-e7d8915f-b211-4634-95a2-f0f581bc3a9b.jpg?auto=format%2Ccompress&w=2100&h=1401)
Hörður Arnarson, forstjóri Landsvirkjunar
Erfið staða í vatnsbúskap fyrirtækisins og skerðingar sökum hennar settu nokkurn svip á afkomu Landsvirkjunar á ársfjórðungnum. Selt magn dróst af þeim sökum saman um 6% frá sama tíma í fyrra. Meðalverð til stórnotenda lækkaði einnig miðað við sama tímabil á síðasta ári. Lækkunina má að mestu rekja til þess að verðtenging við Nordpool-markaðinn í samningi við einn stórnotanda féll niður í lok síðasta árs. Rekstrartekjur á fyrsta fjórðungi drógust saman um 18% miðað við sama tímabil árið 2023.
Áfram batnar fjárhagsstaða Landsvirkjunar. Nettó skuldir lækkuðu um 95 milljónir bandaríkjadala frá áramótum og eiginfjárhlutfall er hærra en nokkru sinni fyrr í sögu fyrirtækisins, eða 65,9%.“